Nuriddinova Xurshida Toshevna

Vazifalari va faoliyat yoʻnalishlari

Laboratoriya haqida

Tahliliy sinov laboratoriyasi — Tuproqshunoslik va agrokimyoviy tadqiqotlar institutining ilmiy-tadqiqot ishlarini zamonaviy laboratoriya tahlillari bilan ta’minlovchi, tuproq, oʻsimlik va tabiiy suv namunalarini tahlil qilish, yangi tahlil usullarini joriy etish hamda laboratoriya xizmatlarini koʻrsatishga ixtisoslashgan tarkibiy boʻlinmadir. Laboratoriyada zamonaviy instrumental usullar, xalqaro standartlar va ilgʻor laboratoriya texnologiyalaridan foydalangan holda tuproq, oʻsimlik va suv namunalarining kimyoviy va agrokimyoviy tarkibi oʻrganiladi.

Asosiy vazifalari

Institutning ilmiy-tadqiqot ishlarini zamonaviy laboratoriya tahlillari bilan ta’minlash;

Tuproq, oʻsimlik va tabiiy suvlarni tahlil qilishda zamonaviy instrumental usullarni qoʻllash va yangi tahlil usullarini joriy etish;

Respublika sugʻoriladigan qishloq xoʻjaligi yerlarining tuproq sifatini (ball-bonitetini) baholash ishlarini tahliliy jihatdan ta’minlash;

Sugʻoriladigan yerlarda tuproq shoʻrlanishi darajasini monitoring qilish va shoʻrlanish kartogrammalarini tuzish uchun tuproq namunalarini tahlil qilish;

Tuproq agrokimyoviy kartogrammalarini tuzish uchun tuproq namunalarini tahlil qilish;

Tuproqlarning mikroelementlar (Cu, Zn, Mn, B, Co, Mo) bilan ta’minlanganlik darajasini baholash;

Agroklasterlar, fermer va dehqon xoʻjaliklari murojaatlari asosida tuproq, oʻsimlik va suv namunalarini tahlil qilish;

Respublika miqyosida tuproq namunalari va tahlil natijalarining elektron ma’lumotlar bazasini shakllantirish va yuritish;

Tuproq unumdorligini saqlash va oshirish, mineral hamda organik oʻgʻitlardan samarali foydalanish boʻyicha ilmiy asoslangan tavsiyalar ishlab chiqish.

Laboratoriyada amalga oshiriladigan asosiy tahlillar

Laboratoriyada 30 dan ortiq tuproq, oʻsimlik va suv tahlillari amalga oshiriladi: granulometrik tarkib, suvda eriydigan tuzlar, almashinuvchi kationlar, pH, EC, karbonatlar va gips, gumus, umumiy va harakatchan NPK, mikroelementlar, ogʻir metallar (Ni, Cr, Cu, Zn, Pb, Cd), shoʻrlanish darajasi; suv va oʻsimlik tahlillari; mobil laboratoriya yordamida dala sharoitida tezkor tahlil. Laboratoriya xoʻjalik shartnomalari asosida agroklasterlar, fermer va dehqon xoʻjaliklari, qishloq xoʻjaligi korxonalari hamda ilmiy-tadqiqot va ta’lim muassasalariga xizmat koʻrsatadi.

Biografiya

X.T. Nuriddinova 20 yildan ortiq ilmiy faoliyat tajribasiga ega.

X.T. Nuriddinova mehnat faoliyatini 2005-yilda Tuproqshunoslik va agrokimyo ilmiy-tadqiqot institutida boshlagan. 2019-yil 31-yanvarda qishloq xoʻjaligi fanlari boʻyicha falsafa doktori (PhD) ilmiy darajasini olgan. 2020-yildan buyon Institutning «Tahliliy sinov laboratoriyasi» boʻlimi mudiri lavozimida faoliyat yuritib kelmoqda.

X.T. Nuriddinova tuproq tahlillariga zamonaviy usullarni joriy etish, tahlil natijalarining sifati va ishonchliligini oshirish yoʻnalishida faol ish olib bormoqda. Uning bevosita ishtirokida tuproq tahlillariga oid ISO xalqaro standartlari va usullari respublikamiz tuproq-iqlim sharoitiga moslashtirilib, amaliyotga joriy etilmoqda.

Asosiy faoliyat va yutuqlari

Ilmiy izlanishlari tuproqdagi azot shakllari va balansi, «tuproq–oʻgʻit–oʻsimlik» tizimida azot aylanishi, tuproq unumdorligi va ekinlar hosildorligini oshirish masalalariga qaratilgan;

Ilmiy tadqiqotlari natijalari boʻyicha 90 dan ortiq ilmiy ishlar chop etilgan;

2022-yil dekabr oyida katta ilmiy xodim ilmiy unvoniga ega boʻlgan;

Institutda amalga oshirilgan 6 ta amaliy ilmiy loyihada asosiy ijrochi sifatida ishtirok etgan;

ISO/TC 190 «Soil quality – Tuproq sifati» xalqaro texnik qoʻmitasining kuzatuvchi a’zosi;

Oʻzbekiston Respublikasi Prezidentining 2026-yil 25-iyundagi farmoniga muvofiq ta’sis etilgan «Oʻzbekiston Respublikasi Mustaqilligining 35 yilligi» koʻkrak nishoni bilan taqdirlangan.