Бугун Тупроқшунослик ва агрокимёвий тадқиқотлар институти мажлислар залида институт ҳузуридаги DSc.25/30.12.2019.Qx/B.43.01 рақамли қишлоқ хўжалик ва биология фанлари бўйича фан доктори (DSc) ва фалсафа доктори (PhD) илмий даражаларини берувчи Илмий кенгаш асосида тузилган бир мартали Илмий кенгаш мажлиси бўлиб ўтди. Йиғилишда Илмий кенгаш аъзолари, профессор ҳамда катта илмий ходимлар иштирок этди. Ушбу йиғилишни Тупроқшунослик ва агрокимёвий тадқиқотлар институти директори, Илмий кенгаши раиси биология фанлари доктори Ш.Бобомуродов олиб борди.
Йиғилиш кун тартибига кўра, Турдиметов Шахобиддин Мухитдиновичнинг «Мирзачўл воҳаси тупроқлари ва улар унумдорлигини дуккакли-дон ва ем-хашак экинлари экиш орқали ошириш» мавзусидаги 06.01.03 – «Агротупроқшунослик ва агрофизика» ихтисослиги бўйича биология фанлари доктори (DSc) илмий даражасини олиш учун тақдим этган диссертация иши муҳокамасига бағишланди.
Мазкур йиғилишда Ш.Турдиметов диссертация ишининг долзарблиги, илмий-амалий аҳамияти, муҳим илмий хулосалари ва ишлаб чиқаришга тавсиялари билан кенгаш аъзоларини таништирди.
Шундан сўнг кенгаш аъзолари ва йиғилганлар томонидан диссертация юзасидан савол-жавоблар бўлиб ўтди.
Илмий кенгаш томонидан Ш.Турдиметовнинг тайёрлаган диссертация иши ОАК талабларига тўлиқ жавоб бериши маъқуланди.
Ушбу навбатдаги Илмий кенгаш иши онлайн ва оффлайн шаклида юқори савияда бўлиб ўтди.