Новости института

Ўзбекистон Республикаси Президентининг 2020 йил 28 январдаги “Ўзбекистон Республикаси қишлоқ хўжалигини ривожлантиришнинг 2020-2030 йилларга мўлжалланган стратегиясида белгиланган вазифаларни 2020 йилда амалга ошириш чора-тадбирлари тўғрисида”ги ПҚ-4575-сон қарори билан тасдиқланган чора-тадбирлар дастури ижросини таъминлаш мақсадида Қишлоқ хўжалиги вазирлиги топшириғига асосан, Тупроқшунослик ва агрокимё илмий-тадқиқот институтида ҳудудларда фермер хўжаликлари, кластерлар ва томорқа ер эгаларига тезкор тупроқ хизматларини кўрсатувчи 1 та “ТУПРОҚ КЛИНИКАСИ” мобил лабораторияси ташкил этилган эди.

Ўтган давр мобайнида ушбу мобил лаборатория ёрдамида Тошкент вилояти Қуйи Чирчиқ туманидаги «ТСТ Rice Cluster», Қашқадарё вилояти Косон туманидаги «BUNYODKOR»MCHJ, Бухоро вилоятидаги «Бухоро Агрокластер», Қоровулбозор туманидаги «Бухоро Агрокластер заминлари» ва Пешку туманидаги «Бухоро сервис Агрокластер» МЧЖ, Жиззах вилояти Зомин туманидаги «AGRO FINANS LIZING»AЖ, Пахтакор туманидаги «SILVER LIFE» агрокластерлари ва бошқа ердан фойданувчиларга тезкор тупроқ хизматлари кўрсатилди.

Инновацион ривожланиш вазирлиги лойиҳаси доирасида жорий йилнинг ноябрь ойида институтда қўшимча яна 2 та мобил тупроқ лабораторияси ташкил этилди.

Махсус машиналар Россиянинг “Газель Next” компаниясидан олинди.

Ушбу мобил лабораториянинг асбоб-ускуналари Германиянинг “STEP Systems GmbH” компанияси томонидан олиб келинди, унинг асосини LASA AGRO Mobil комплекси ташкил этади.

Мобил лаборатория таркибига LASA AGRO DR 2800 спектрометри,  PNT 3000COMBI ваpH-метр PH 3000,люкс-метр, квантометр, СО₂-метр T 535, О₂-метр, влагомер ва термометрлар киради.

Бугун “Ўздаверлойиҳа” давлат-илмий лойиҳалаш институтида Жахон банкининг “Қишлоқ хўжалигини модернизациялаш” лойиҳаси доирасида Жанубий Корея Республикаси Қишлоқ хўжалик вазирлигининг Қишлоқ ҳудудларини ривожлантириш Агентлиги вакиллари билан Тупроқшунослик ва агрокимё илмий-тадқиқот институти ходимларининг учрашуви ўтказилди.

Учрашувда мамлакатимизда тупроқлар унумдорлигини сақлаш ва ошириш соҳасида амалга оширилган ишлар, эришилган ютуқлар бўйича маълумот берилди ҳамда Корея Республикаси тупроқшунослари билан узоқ муддатли ўзаро ҳамкорлик масалалари муҳокама қилинди. 

Ўзбекистон Республикаси Қишлоқ хўжалиги вазирлиги кўмагида «Шўрланишни тўхтатиш – тупроқ унумдорлигини ошириш» мавзусида шўрланган тупроқлар бўйича Глобал симпозиуми ўтказилди. Илмий-сиёсий тадбир Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) ва унинг Глобал тупроқ ҳамкорлиги, Тупроқ бўйича давлатлараро техник кенгаши  томонидан Ўзбекистон Республикаси Қишлоқ хўжалиги вазирлиги ва бир қатор миллий ва хорижий ҳамкорлар билан биргаликда ташкил этилди.

Шўрланган тупроқлар бўйича Глобал симпозиумнинг асосий мақсади – фан, амалиёт ва сиёсатни бирлаштириш, шўрланган тупроқларни бошқариш билан боғлиқ ҳолат ва муаммоларни таҳлил қилиш ва тупроқ ресурсларидан оқилона фойдаланиш бўйича ихтиёрий кўрсатмаларни амалга ошириш учун ҳаракатни рағбатлантиришдир. Симпозиум шўрланган тупроқларни барқарор бошқариш учун мавжуд билим ва амалий ечимлар ҳақида фикр алмашиш, шунингдек, муваффақиятли амалиёт ва технологияларни кенгайтириш учун зарур бўлган ҳаракатларни муҳокама қилиш учун платформалар яратади.

Тупроқлар озиқ-овқат ишлаб чиқариш ва кўплаб муҳим экотизим хизматлари кўрсатиш учун асосдир. Тупроқ ресурсларини барқарор бошқариш озиқ-овқат ишлаб чиқаришни кўпайтириш, озиқ-овқатнинг озуқавий қийматини яхшилаш, шунингдек иқлим ўзгариши оқибатларига мослашиш ва уларни юмшатишга ёрдам беради.

Виртуал форматда ўтказилган Глобал симпозиум доирасида 2021-йил 20-октабр куни Тошкентда «Озиқ-овқат хавфсизлигини таъминлашда шўрланган тупроқларнинг интеграллашган бошқаруви ва мелиорацияси: янги ёндашувлар ва инновацион ечимлар» мавзусида миллий симпозиум бўлиб ўтди. Тадбирда ФАО экспертлари, вазирлик ва идоралар вакиллари, Олий Мажлис Сенати аъзолари, олий ўқув юртларининг профессор-ўқитувчилари, Ўзбекистон Республикаси Фанлар Академияси илмий-тадқиқот институтлари ходимлари иштирок этди.

Тадбирда шунингдек, Тупроқшунослик ва агрокимё илмий-тадқиқот институти директори Шуҳрат Бобомуродов сўзга чиқиб, суғориладиган ерларнинг иккиламчи шўрланишини олдини олиш, шўрланган тупроқлар муҳофазаси, сунъий интеллект масалаларига тўхталиб ўтди.

Миллий симпозиумда республикамизнинг суғориладиган ерларини иккиламчи шўрланишини олдини олиш, шўрланган тупроқларни муҳофаза қилишда рақамли ва сунъий интеллект технологияларини жорий қилиш, иқлим ўзгариши шароитида Орол денгизининг ижтимоий-экологик муаммоларини ҳал етиш ҳамда бошқа масалалар юзасидан маърузалар тингланди. Тадбир давомида замонамизнинг енг йирик экологик офатларидан бирига эътиборни қаратишга мўлжалланган «Орол денгизининг қуриган тубини тиклаш» видеофильми тақдим этилди.

Бундан ташқари, Миллий симпозиум доирасида иқтидорли ёшларнинг “Энг яхши илмий ишлари”ни тақдирлаш маросими бўлиб ўтди.

2021 йил 14 октябрь куни Тупроқшунослик ва агрокимё илмий-тадқиқот институти Илмий кенгашининг навбатдаги мажлиси ўтказилди.

Мажлисда институтда бажарилаётган ФЗ-201906147 шифрли “Қишлоқ хўжалигида фойдаланиладиган экин майдонларининг токсик моддалар билан заҳарланиш даражасидан келиб чиқиб 3D картасини тузиш ва экологик тоза маҳсулотлар етиштириш технологиясини ишлаб чиқиш” мавзусидаги амалий лойиҳасининг оралиқ йиллик ҳисоботи ҳамда институт ходимларининг “Катта илмий ходим” илмий унвонини олиши учун Олий Аттестация Комиссиясига тақдим этишга тайёрланган хужжатлари муҳокама қилинди.